Fáiltíonn Comhairle na Gaelscolaíochta roimh an aitheantas a thugtar san Athbhreithniú Neamhspleach ar an Churaclam, a d’fhoilsigh Roinn an Oideachais ar an 3ú Meitheamh, ar na dúshláin ar leith a chothaíonn an curaclam reatha do sholáthar an teagaisc agus na foghlama i gcomhthéacs Gaelscolaíochta.
D’aithin ionadaithe earnáil na Gaelscolaíochta, nár phléigh an curaclam reatha le sáintreithe an tumoideachais agus nach raibh sé ionadaíoch ar an aistear foghlama fríd an Ghaelscolaíocht. Is ábhair dóchais iad na moltaí atá leagtha amach ag údar an athbhreithnithe, Lucy Crehan, le dul i ngleic leis an neamart sin.
I measc na moltaí atá déanta san athbhreithniú, tá sprioc soiléir leagtha amach chun ‘curaclaim agus áiseanna cuí a chinntiú do dhaltaí Gaelscolaíochta’ agus luaitear go sonrúil ‘easpa áiseanna measúnaithe agus easpa foghlaim ghairmiúil, atá ina mbac i leith comhionannas’
Ghabh Príomhfheidhmeannach Chomhairle na Gaelscolaíochta, Maria Thomasson buíochas ar leith le Lucy Crehan, as na deiseanna a thug sí don Chomhairle agus do chleachtóirí na hearnála cur i láthair a dhéanamh do phainéal na hathbhreithnithe ar easnaimh an churaclaim reatha agus moltaí i leith churaclaim úire:
‘Is léir go ndeachaigh a raibh le rá ag Comhairle na Gaelscolaíochta agus cleachtóirí earnálacha, i bhfeidhm go mór ar Lucy agus a cuid comhghleacaithe. Tá muid thar a bheith buíoch an deis a fháil, turas foghlama sainiúil daltaí Gaelscolaíochta a mhíniú, i gcomhthéacs an tumoideachais, agus tá muid ag dúil go mór leis an tuairisc ina iomlán a léamh agus le bheith go hiomlán rannpháirteach i gcur i gcrích moltaí an Athbhreithnithe amach anseo.’
Is féidir theacht ar an tuairisc ina iomlán anseo: Review of the Northern Ireland Curriculum | Department of Education
