Rinne ionadaithe ó Chomhairle na Gaelscolaíochta (CnaG) cur i láthair do Choiste Oideachais an Tionóil an tseachtain seo caite, áit a ndíríodh ar Riachtanais Speisialta Oideachais (RSO) in earnáil na Gaelscolaíochta.
Thug Maria Thomasson, Príomhfheidhmeannach agus Orla Nig Fhearraigh, Oifigeach Sinsearach Oideachais, aghaidh ar na bearnaí sa soláthar do riachtanas speisialta san earnáil, go háirithe maidir le huirlisí measúnaithe, acmhainní teagaisc agus foghlama, soláthar speisialaithe agus an easpa pearsanra atá cáilithe go cuí agus a bhfuil taithí acu, atá in ann cúnamh a thairiscint do pháistí Gaelscolaíochta, trí mheán na Gaeilge.
Rinneadh tagairt arís agus arís eile do pháipéar taighde 2025 CnaG ‘An Soláthar do Riachtanais Speisialta Oideachais agus do Mhíchumas sa Ghaelscolaíocht,’ ina ndéantar iniúchadh domhain ar an iliomad saincheisteanna atá os comhair na hearnála maidir le SEN agus ina gcuirtear réimse réitigh i láthair. Is féidir teacht ar chóip den tuarascáil anseo: Taighde.
Dhírigh ceisteanna ón Choiste Oideachais ní hamháin ar RSO ach freisin ar an obair atá ar siúl sa Roinn Oideachais ar straitéis don Ghaelscolaíocht. Leanfaidh CnaG ag déanamh abhcóideachta le haghaidh straitéis chuimsitheach a thabharfaidh aghaidh ar na saincheisteanna iomadúla atá os comhair na hearnála, ní hamháin maidir le RSO ach fosta, maidir le dúshláin a bhaineann le fórsa oibre, cóiríocht agus acmhainní teagaisc agus foghlama.
Sa ghrianghraf thíos, ó chlé, tá Ciarán Mackin agus Jordy Ó Cathain, aistritheoirí an Tionóil, a chuir seirbhís aistriúcháin ar fail do chur i láthair CnaG; Maria Thomasson, PF agus Orla Nig Fhearraigh, OSO.
