Category: Press Release

Sa phictiúr: Samhail fhoirgneamh úr Ghaelscoil Uí Néill

D’fhógair an Roinn Oideachais níos mó dea-scéala d’earnáil na Gaelscolaíochta an tseachtain seo nuair a fógraíodh go raibh tús le cur leis an obair ar fhoirgneamh nua scoile do Ghaelscoil Uí Néill in Oileán an Ghuail. Tar éis an scéala le déanaí go bhfuil cead tugtha do Scoil an Droichid i mBéal Feirste an tógáil nua a chur chun cinn, tá lúcháir ar Chomhairle na Gaelscolaíochta (CnaG) go bhfuil conraitheoirí ceaptha ag Gaelscoil Uí Néill, a bunaíodh den chéad uair in 1995, chun tús a chur leis an obair ar a n-áitreabh nua.

 

Chuir Gearóid Ó Gealbháin, Cathaoirleach Bhord Gobharnóirí Ghaelscoil Uí Néill, a lúcháir in iúl faoin bhfógra:

 

‘Tar éis blianta de phleanáil agus de chruinnithe gan áireamh, tá áthas ar Bhord Gobharnóirí Ghaelscoil Uí Néill a fhógairt go bhfuil treoir le tabhairt dár gconraitheoirí Connolly & Fee, tús a chur le tógáil ár nGaelscoil nua ar Pháirc Imeartha Ghort Gonaidh. Ba mhaith linn aitheantas a thabhairt d’iarrachtaí leanúnacha oifigigh de chuid na Roinne Oideachais, an Údaráis Oideachais, CnaG agus Chomhairle Lár Uladh chomh maith le hionadaithe polaitiúla áitiúla a chabhraigh lenár n-aisling a thabhairt chun críche.’

 

Chuir Maria Thomasson, Príomhfheidhmeannach CnaG, fáilte roimh chinneadh na Roinne Oideachais tógáil nua na scoile a chur chun cinn:

 

‘Tá CnaG thar a bheith sásta go mbainfidh Gaelscoil Uí Néill amach faoi dheireadh, foirgneamh scoile úrscothach a fhreastalóidh ar phobail Oileán an Ghuail agus Chluain Eo ar feadh na nglúnta. Cuirfidh an foirgneamh nua ar chumas Ghaelscoil Uí Néill leanúint ar aghaidh ag cur oideachas den chéad scoth ar fáil trí mheán na Gaeilge i dtimpeallacht a chuirfidh go mór le heispéireas teagaisc agus foghlama na ndaltaí. Ba mhaith liom comhghairdeas a dhéanamh le pobal uile na scoile as an chloch mhíle shuntasach seo a bhaint amach agus aitheantas a thabhairt dá dtiomantas don tionscadal seo thar na blianta fada.

Agus an maoiniú a theastaíonn don tógáil nua seo á chur ar fáil, tá céim eile sa treo ceart á ghlacadh ag an Roinn Oideachais chun dul i ngleic leis na heasnaimh chóiríochta atá san earnáil Gaelscolaíochta le fada an lá chun torthaí foghlama a fheabhsú do dhaltaí Gaelscolaíochta.’

 

Cuireann Comhairle na Gaelscolaíochta (CnaG) fáilte mhór roimh fhógra an Aire Oideachais ar maidin (28 Bealtaine 2024) leis an tógáil nua a chur chun cinn do chúig scoil déag, ina measc Scoil an Droichid, an t-aon soláthraí oideachais lán-Ghaeilge i dTuaisceart Bhéal Feirste.

 

Fógraíodh Scoil an Droichid, atá lonnaithe i Sráid Cooke, Bóthar Ormeau Íochtarach, den chéad uair mar chuid de liosta Tógála Mórchathrach an Roinn Oideachais in 2015.

Tá beagnach deich mbliana caite ón fhógra tosaigh sin agus tá lúcháir agus faoiseamh ar phobal na scoile an solas glas a fháil ón Aire ar maidin chun tús a chur leis an obair soláthair agus tógála.

Chuir Claire Donnelly Príomhoide Scoil an Droichid fáilte roimh chinneadh an Aire agus dúirt sí, “Tá líon na ndaltaí sa scoil agus sa naíscoil ag ardú bliain i ndiaidh bliana, agus tá áit, áiseanna agus spás úr de dhíth orthu ar fad. Ba mhaith linn anois go mbogadh an tionscadal ar aghaidh gan mhoill chun chonradh oibre a bhronnadh agus talamh a bhriseadh ar shuíomh úr na scoile”

Chuir Maria Thomasson, Príomhfheidhmeannach Chomhairle na Gaelscolaíochta leis an méid a bhí le rá ag Claire, “Beidh pobal uile na scoile agus earnáil na Gaelscolaíochta i gcoitinne iontach sásta go deo leis an nuacht seo. Tá fáilte mhór roimh fhógra an Aire Givan ar maidin agus tabharfaidh sé misneach agus dóchas do dhaltaí, do thuismitheoirí, d’fhoireann agus do ghobharnóirí Scoil an Droichid. Beidh dhá rang ar leith san fhoirgneamh nua fosta le tacú le daltaí Gaelscolaíochta a bhfuil riachtanais bhreise foghlama acu. I bhfianaise an mhéadaithe atá tagtha ar an éileamh ar na sainranganna seo le blianta beaga anuas, tá an soláthar seo riachtanach dár n-earnáil mar nach bhfuil tacaíocht dá leithéid ann faoi láthair in earnáil na Gaelscolaíochta taobh amuigh d’Iarthar Bhéal Feirste.”

 

Ina ráiteas ar maidin, thagair an tAire do chláir infheistíochta ar scála níos lú a bheas ar fáil do scoileanna eile chun tacú le seachadadh an churaclaim amach anseo.

 

Arís eile, chuir Maria fáilte roimh an fhógra seo agus dúirt sí, “Ní rún ar bith é go bhfuil infheistíocht shuntasach ag teastáil chun cóiríocht agus bonneagar a fheabhsú ar fud earnáil na Gaelscolaíochta. Fáiltím roimh thiomantas an Aire tacú leis na scoileanna sin nach bhfuil ar an liosta inniu agus tá mé ag dúil le tuilleadh sonraí a chloisteáil sna seachtainí amach romhainn maidir leis na cláir eile seo. Tá sé ríthábhachtach go dtabharfar gach deis do ghaelscoileanna rochtain a fháil ar aon tacaíocht atá ar fáil ón Roinn Oideachais leis an churaclam a sheachadadh go héifeachtach chun torthaí a fheabhsú do dhaltaí na hearnála.”

 

Léigh ráiteas iomlán an Aire ag an nasc seo https://www.education-ni.gov.uk/news/givan-announces-fifteen-school-building-projects-progress-construction